سياسة الخصوصية
آخر تحديث: ٢١ أكتوبر ٢٠٢٦
قفلها منصة مذاكرة لطلاب الإعدادي والثانوي. الصفحة دي بتشرح البيانات اللي بناخدها منك، وبنعمل بيها إيه، وحقوقك فيها.
البيانات اللي بناخدها
- بيانات الحساب: اسمك، ورقم موبايلك، وصفك الدراسي، ومحافظتك لو كتبتها. كلمة السر بتتخزن مشفّرة، ومحدش يقدر يقراها.
- تأكيد الرقم: بتأكد رقمك برسالة منك على واتساب لرقم قفلها، وبنستخدم الرسالة دي بس عشان نتأكد إن الرقم بتاعك.
- مذاكرتك: إجاباتك في التدريب والامتحانات والألعاب، ونسبة إتقانك لكل درس، وأخطاءك، وأيام مذاكرتك، ونقطك. دي اللي بتخلي التطبيق يقولك أضعف دروسك.
- المساعد: الأسئلة اللي بتكتبها للمساعد، والصور اللي بتبعتهاله (زي صورة مسألة من كتابك)، ومحادثاتك معاه.
- جهازك: رقم مميز للجهاز بيعمله التطبيق (مش رقم تليفونك ولا بيانات من موبايلك)، ونوع الموبايل وموديله، ونسخة نظام التشغيل ونسخة التطبيق، وعنوان الشبكة (IP) اللي دخلت منه، وآخر مرة استخدمت فيها التطبيق. ده عشان الحساب يفضل مربوط بجهازك ومحدش يستخدمه غيرك، وعشان لو بعتلنا مشكلة نعرف بتحصل على أنهي جهاز. مش بنستخدمه في إعلانات، وبيتمسح لما تمسح حسابك.
- الدفع: الدفع بيتم عن طريق شركة دفع إلكتروني (فواتيرك). إحنا بنعرف المبلغ وحالة الدفع بس، وبيانات الكارت عمرها ما بتوصلنا.
بنستخدمها في إيه
- نفتحلك حسابك ونأمّنه، ونفعّل اشتراكك.
- نصحّح إجاباتك ونوريك تقدّمك ونقترح عليك تذاكر إيه.
- نرد عليك لو كلمتنا، ونبعتلك اللي يخص حسابك.
المحتوى التعليمي
الشرح والأسئلة والملخصات والخرايط في قفلها بتتعمل بمساعدة الذكاء الاصطناعي من المناهج الدراسية نفسها، وبتتراجع قبل ما توصل لك. ولو لقيت سؤال أو إجابة شايفها غلط، دوس «بلّغ عن خطأ» جنبها، وهنراجعها ونصلّحها.
تصحيح المقالي بالذكاء الاصطناعي
لما تكتب إجابة مقالية، نص الإجابة بيتبعت لخدمة التصحيح بتاعتنا، وبتستخدم نماذج ذكاء اصطناعي من مزوّدين زي جوجل. بنبعت الإجابة والسؤال بس، من غير اسمك أو رقمك. ونفس الخدمة بتطلّعلك الكلمات اللي كتبتها غلط إملائيًا عشان تتعلم تكتبها صح؛ ودي مابتأثرش على درجتك.
المساعد
لما تسأل المساعد، سؤالك وصورتك لو بعتّ صورة بيتبعتوا لخدمة الذكاء الاصطناعي بتاعتنا عشان تكتب الرد، وبتستخدم نماذج من مزوّدين زي جوجل. بنبعت السؤال، والدرس اللي إنت فيه، واسمك الأول بس عشان يكلمك بيه، من غير رقمك. الصور بتتمسح لوحدها بعد ٣٠ يوم، وتقدر تمسح أي محادثة بنفسك من جوه التطبيق.
لوحة الشرف
نقطك بتطلّعك في «لوحة الشرف» مع طلبة سنتك. الطلبة التانيين بيشوفوا اسمك الأول وأول حرف من اسم والدك بس (زي «ريم س.») ونقطك، ومش بيشوفوا رقمك أبدًا. تقدر من «حسابي» تختار تظهر باسم «طالب من قفلها»، أو تختفي من اللوحة خالص.
مع مين بنشارك بياناتك
ما بنبيعش بياناتك لحد. بنشارك بس اللي لازم مع الخدمات اللي بتشغّل المنصة (الاستضافة، والدفع، والتصحيح)، أو لو القانون طلب كده.
قياس الإعلانات
لما حد يفتح لينك من لينكات قفلها، بنسجّل إن اللينك اتفتح، ومن أنهي جهاز وأنهي موقع، من غير ما نحتفظ بعنوان الـ IP. ده بيعرّفنا أنهي إعلان بيوصل للطلبة. ولو عملت حساب بعدها، بنعرف إنه جه من اللينك ده.
بنستخدم بكسل Meta وواجهة التحويلات عشان نقيس إعلانات قفلها: زيارة الموقع، وإنشاء الحساب، والاشتراك المدفوع وقيمته بالجنيه. لو شاركنا رقمك أو إيميلك بيكون بعد توحيد صيغته وتحويله لبصمة SHA-256، ومن غير اسمك. تقدر توقف القياس من «حسابي»، أو توقفه للمتصفح ده من الاختيار هنا.
حقوقك
- تقدر تعدّل اسمك وصفك من جوه التطبيق.
- تقدر تمسح حسابك بنفسك من «حسابي» ← «احذف حسابي». الحساب بيتقفل على طول، وبعد 60 يوم بيتمسح نهائي هو وكل بياناته. لو غيّرت رأيك قبلها كلّمنا ونرجّعهولك. بنحتفظ بس بسجل المدفوعات اللي القانون والحسابات بيطلبوه.
- تقدر تطلب نسخة من بياناتك لما تكلمنا.
- لو سنك أقل من ١٨ سنة، يُفضّل ولي أمرك يكون عارف إنك مشترك.
كلّمنا
لأي سؤال عن خصوصيتك: واتساب